रौतहट । रौतहटको फतुवा बिजयपुरमा नेपाली कांग्रेस नगर समितिद्वारा संविधान २०७२ को रक्षा र लोकतन्त्रको संरक्षणका लागि विरोध प्रदर्शन गरिएको छ।
शुक्रबार गरिएको प्रदर्शनमा सहभागीहरूले संविधानमाथि बढ्दो खतरा, विदेशी हस्तक्षेप र देशलाई सैन्यकरणतर्फ धकेल्ने प्रयास भइरहेको भन्दै विरोध जनाए। उनीहरूले संविधानको रक्षा, राष्ट्रपतिलाई सक्रिय भूमिका, भ्रष्टाचार र बेथितिको अन्त्य तथा लोकतन्त्रको पुनर्बहालीको माग उठाए।
नेपाली कांग्रेसका युवा नेता ज्ञानेन्द्र प्रसाद यादवले प्रदर्शनलाई सम्बोधन गर्दै, “विदेशी हस्तक्षेप बढ्दै गएको छ, भ्रष्टाचार र बेथितिले मुलुकलाई संकटतर्फ धकेल्दैछ। संविधान र लोकतन्त्र जोगाउन कांग्रेस सडकमा उत्रिएको हो,” भने।
त्यसैगरी, फतुवा विजयपुर नगरपालिकाका पूर्व मेयर तथा कांग्रेस नेता गोपाल राय यादवले वर्तमान संविधानभित्रै समस्याको समाधान खोज्नुपर्नेमा जोड दिँदै भने,
“लोकतन्त्रसँग कुनै सम्झौता हुँदैन। विदेशी हस्तक्षेप र सैन्य गतिविधि लोकतन्त्रका लागि घातक छन्। भ्रष्टाचार र बेथिति अन्त्य नगरी देशको अवस्था सुध्रिँदैन।”उनले संविधान र व्यवस्थामाथि कुनै आँच आए कांग्रेसले सहयोग नगर्ने चेतावनी पनि दिए।
